27/05/2026
របៀបធ្វើ ត្រីឆ្ពុងបំពងទឹកត្រីជូអែម
---------------------
#គ្រឿងផ្សំ
- ត្រីឆ្ពុង ១ក្បាល (១គីឡូជាង)
- ស្ករត្នោត ៥ស្លាបព្រាបាយ
- ទឹកត្រី ៤ស្លាបព្រាបាយ
- ទឹកអំពិលទុំ ៣ស្លាបព្រាបាយ
- ទឹកធម្មតា ៥ស្លាបព្រាបាយ
- គល់ស្លឹកគ្រៃ ១ដើម(ហាន់ស្តើងៗ)
- ខ្ញី ១ដុំតូច (ហាន់រាង្គជ្រុងតូចៗ)
- ក្រូចឆ្មារ ១ផ្លែ (ហាន់រាង្គជ្រុងតូចៗ)
- ខ្ទឹមក្រហម ៤ដុំ (ហាន់ស្តើង)
- ម្ទេសក្រហម+ខៀវ (ហាន់ល្អិតៗ)
- ស្វាយខ្ចី(ហាន់សរសៃៗ) ៣ស្លាបព្រាបាយ
- ស្លឹកក្រូចសើច ២សន្លឹក (ហាន់សរសៃតូចៗ)
- ម្សៅបំពង ២ស្លាបព្រាបាយ
- ទឹកក្រូចឆ្មារ ១,៥ស្លាបព្រាបាយ
- ម្ទេសឆា ១ស្លាបព្រាបាយ
- គ្រាប់ចន្ទីលីង
- ស្លឹកជីអង្កាម
- ម្ទេសក្រៀម
#របៀបធ្វើ
- ធ្វើស្រកាត្រីឲ្យស្អាត រួចវះត្រីជាពីរ ជាយកឆ្អឹងកណ្តាលចេញសឹមលាងសម្អាតឲ្យស្អាតល្អ យកអំបិលបន្តិចលាបម៉ាសាលើត្រីឲ្យសព្វល្អ។
- ជូតត្រីឲ្យស្ងួតទឹកល្អ យកម្សៅបំពងលាបឲ្យសព្វត្រី រួចយកទៅបំពងក្នុងប្រេងឆាកំពុងក្តៅឲ្យឆ្អិននឹងឡើងពណ៌ក្រហមស្អាត។
- យកឆ្នាំងដាក់ស្ករ ទឹកត្រី ទឹកអំពិលទុំ និងទឹកចូលកូរឲ្យរលាយសព្វចូលគ្នា រំងាស់ឲ្យដាច់ទឹកបន្តិច។
- យកចានដាក់ម្ទេសឆា ទឹកត្រីស្ករដែលចំអិនរួច និងទឹកក្រូចឆ្មារចូលកូរឲ្យសព្វល្អសឹមដាក់ខ្ទឹម ក្រូចឆ្មារ ខ្ញី គល់ស្លឹកគ្រៃ ស្លឹកក្រូចសើច និងស្វាយខ្ចីចូលច្របល់ចូលគ្នាឲ្យសព្វ។
- រៀបត្រីដាក់ចាន ស្រោចទឹកត្រីដែលលាយរួចពីលើ រួចរោយចន្ទី ម្ទេសក្រៀម និងស្លឹកជីអង្កាមពីលើជាការស្រេច៕
អ្នកស្រី សុគន្ធារី
