14/07/2023
ဝန်ကြီးချုပ်ရွေးရန် နာရီပိုင်းအလိုတွင် ပီထာကို ထိုင်းရွေးကော်က ခုံရုံးတင်ရန် ဆုံးဖြတ်
Dawei Watch| ဇူလိုင် ၁၂
ထိုင်းဝန်ကြီးချုပ်ရွေးချယ်ရန် နာရီပိုင်းသာ လိုတော့သည့်အချိန်တွင် ထိုင်းနိုင်ငံ ဝန်ကြီးချုပ်လောင်း ပီထာ လင်မ်ဂျာဂျွန်ရတ်ကို မီဒီယာကုမ္ပဏီတစ်ခု၏ ရှယ်ယာပိုင်ဆိုင်မှုများနှင့်ပက်သက်၍ ရွေးကောက်ပွဲကော်မရှင်က ဖွဲ့စည်းပုံ အခြေခံဥပဒေခုံရုံးတင် စစ်ဆေးရန်ဆုံးဖြတ်လိုက်ပြီဖြစ်ကြောင်း ယနေ့ (ဇူလိုင် ၁၂) တွင် ကြေညာလိုက်သည်။
ယင်းဆုံးဖြတ်ချက်ကို ရွေးကောက်ပွဲကော်မရှင်က သုံးရက်ကြာ လက်ခံစဉ်းစားပြီးနောက် ထုတ်ပြန်လိုက်ခြင်းဖြစ်ပြီး ထိုင်းလွှတ်တော်က မနက်ဖြန် ဇူလိုင် ၁၃ ရက်နေ့ နံနက် ၉ နာရီခွဲအချိန်တွင် ထိုင်းဝန်ကြီးချုပ်အသစ်ကို ရွေးကောက်တင်မြှောက်တော့မည်ဖြစ်သည်။
ဝန်ကြီးချုပ်လောင်းကို စုံစမ်းစစ်ဆေးရေးအတွက် ရွေးကောက်ပွဲကော်မရှင်၏ အချက်အလက် စိစစ်ရေးကော်မတီကလည်း သက်သေအလုံအလောက်ကို ရရှိထားပြီဖြစ်ကြောင်း ဆိုထားသည်။
ရွေးကောက်ပွဲကော်မရှင်က ပီတာကို မီဒီယာကုမ္ပဏီတစ်ခုဖြစ်သော iTV ၏ ရှယ်ယာ ၄၂၀၀၀ ပိုင်ဆိုင်ထားမှုကြောင့် လွှတ်တော်အမတ်အနေဖြင့် ရွေးကောက်ခံခွင့်မရှိဆိုသော စွပ်စွဲချက်ကို စုံစမ်းစစ်ဆေးနေခဲ့ခြင်းဖြစ်သည်။
ပီထာက အဆိုပါရှယ်ယာများသည် ၂၀၀၇ ခုနှစ်ကတည်းက လုပ်ကိုင်ခဲ့ခြင်းမရှိတော့ပဲ ဖခင်ဖြစ်သူထံမှ အမွေရရှိထားခြင်းသာဖြစ်ကြောင်း ဆိုထားသည်။
ထိုင်းနိုင်ငံ အခြေခံဥပဒေအရ လွှတ်တော်အမတ်အဖြင့် ရွေးကောက်ခံမည့်သူများသည် သတင်း၊ စာနယ်ဇင်း၊ မီဒီယာလုပ်ငန်းများတွင် ရှယ်ယာပိုင်ဆိုင်ထားပါက ဝင်ရောက်ယှဉ်ပြိုင်ခွင့်မရှိပေ။
ယင်းကိစ္စနှင့်ပက်သက်၍ အခြေခံဥပဒေတရားရုံးက အပတ်စဉ်ဆွေးနွေးပွဲတွင် လက်ခံကြားနာသွားမည်ဖြစ်သည်။
တရားရုံးက ဆုံးဖြတ်ချက် မချခင်အထိ မနက်ဖြန် ဝန်ကြီးချုပ်လောင်းအဖြင့် အရွေးခံမည့် Move Forward ပါတီခေါင်းဆောင် ပီထာကို လွှတ်တော်အမတ်အဖြစ်မှ ယာယီဆိုင်းငံ့ထားရန်ကိုလည်း တရားရုံးကို တိုက်တွန်းထားသည်။
Ref: The Nation Thailand, Thai Enquirer
Dawei Watch ရဲ့ သတင်းတွေကို
Instagram > https://www.instagram.com/dawei_watch/
Telegram > https://t.me/daweiwatch/
Website > http://www.daweiwatch.com/2023/07/12/news/61623/
တို့တွင် ဝင်ရောက်ဖတ်ရှုနိုင်ပါတယ်။
