02/07/2026
"စကားနည်းတဲ့သူ" နဲ့ "စကားများတဲ့သူ" တွဲရင် ဘယ်လိုဖြစ်မလဲ။ 🤔❤️
တစ်ယောက်က စကားစပြောလိုက်ရင် ရေဒီယိုလိုင်းမိသွားသလို မရပ်မနား ပြောတတ်ပြီး၊ နောက်တစ်ယောက်ကတော့ "အင်း၊ ဟုတ်တယ်၊ အိုကေ" ဆိုတဲ့ စကားလုံး သုံးလုံးနဲ့တင် တစ်နေ့တာကို ဖြတ်သန်းနိုင်တဲ့သူမျိုး...။ အဲ့ဒီလို ဆန့်ကျင်ဘက် စရိုက်နှစ်မျိုး ရှိတဲ့သူနှစ်ယောက် ချစ်သူတွေ ဖြစ်လာတဲ့အခါ ဘယ်လိုဆန်းပြားတဲ့ အချစ်ရေးမျိုး ဖြစ်လာမလဲ? အဆင်ပြေပါ့မလားလို့ တွေးနေရင် လက်တွေ့မှာ ဒါမျိုးတွေ ဖြစ်တတ်ပါတယ်ဗျာ။
၁။ တစ်ယောက်က "ပြော"၊ တစ်ယောက်က "နားထောင်" အချိတ်အဆက်အမိဆုံး စုံတွဲဖြစ်လာခြင်း
နှစ်ယောက်လုံး စကားများနေရင်လည်း ရန်ဖြစ်ရတာနဲ့တင် အချိန်ကုန်နေမှာဖြစ်သလို၊ နှစ်ယောက်လုံး စကားနည်းနေရင်လည်း လူကြီးမင်းတို့ ခေါ်ဆိုသော ဖုန်းလိုင်းမှာ ပိတ်ထားပါသည် ဖြစ်နေမှာပါ။ စကားများတဲ့သူက တစ်နေ့တာအကြောင်းတွေ စိတ်လှုပ်ရှားတုန်း ပြောပြတဲ့အခါ စကားနည်းတဲ့သူက အလိုက်သင့်လေး ဘေးကနေ ပြုံးပြုံးလေး နားထောင်ပေးတတ်လို့ အံကိုက်ပါပဲ။
၂။ စကားနည်းတဲ့သူရဲ့ "စကားအများဆုံးအချိန်" က သူနဲ့ရှိနေချိန် ဖြစ်လာခြင်း
လူတကာရှေ့မှာ စကားတစ်ခွန်းပြောဖို့ ဝန်လေးတတ်တဲ့သူက ကိုယ့်ချစ်သူအနား ရောက်တဲ့အခါကျမှ ကလေးတစ်ယောက်လိုမျိုး စကားတွေ တတွတ်တွတ် ပြောလာတတ်ပါတယ်။ ဒါဟာ သူ့ရဲ့ စိတ်လုံခြုံမှုအရှိဆုံး Zone ထဲကို ကိုယ့်ကို ပေးဝင်လိုက်တဲ့ သဘောပါပဲ။
၃။ "ပြောစရာ မလိုဘဲ နားလည်မှု" ဆိုတာမျိုးကို ခံစားရခြင်း
စကားများတဲ့သူက အပြောအဆို သွက်သလောက်၊ စကားနည်းတဲ့သူက အကဲခတ် အလွန်တော်တတ်ပါတယ်။ ချစ်သူ စကားတွေ အများကြီး ပြောနေရင်းကနေ လေသံလေး နည်းနည်း ပြောင်းသွားတာ၊ မျက်နှာအမူအရာ ပျက်သွားတာကို စကားနည်းတဲ့သူက ချက်ချင်း ရိပ်မိပြီး တိတ်တဆိတ် ဂရုစိုက်ပေးတတ်ကြပါတယ်။
၄။ တစ်ခါတရံ "ရေဒီယို" နဲ့ "တရားစခန်း" တွဲနေသလို ခံစားရခြင်း
ဒါကတော့ ချစ်စနိုးနဲ့ ကြုံရမယ့် ပြဿနာလေးပါ။ စကားများတဲ့သူက ရရင်ရသလို အတင်းတွေ လျှောက်ပြောနေတဲ့အချိန်မှာ စကားနည်းတဲ့သူက ဘာမှပြန်မပြောဘဲ ငြိမ်ပြီး နားထောင်နေတတ်လို့ "ငါတစ်ယောက်တည်း စကားပြောနေရတာလား" ဆိုပြီး တစ်ခါတလေ စိတ်ကောက်ရတတ်ပါတယ်။
၅။ တစ်ယောက်ရဲ့ လိုအပ်ချက်ကို တစ်ယောက်က ဖြည့်ဆည်းပေးခြင်း
လူမှုရေးပွဲလမ်းသဘင်တွေ သွားတဲ့အခါ စကားနည်းတဲ့သူအတွက် အားကိုးရဆုံးက စကားများတဲ့ ကိုယ့်ချစ်သူပါပဲ။ ကိုယ်က ဘာပြောရမှန်းမသိဘဲ အနေခက်နေချိန်မှာ ကိုယ့်ချစ်သူက ဘေးကနေ စကားဝိုင်းကို ဦးဆောင်ပြီး ကယ်တင်ပေးတတ်သလို၊ ချစ်သူ စိတ်လှုပ်ရှားပြီး ဒေါသထွက်နေချိန်မှာလည်း စကားနည်းတဲ့သူက အေးအေးဆေးဆေးနဲ့ စိတ်အေးအောင် ပြန်ထိန်းပေးနိုင်ပါတယ်။
#စကားနည်းသူနှင့်စကားများသူ
