05/08/2020
"عام الباك :
مالنهار لي تتولد فيه يختارولك حياتك و يسطرولهالك بالمسطرة ، تكبر و تدخل تقرا ، و تتعلم و تعرف الي لازمك ديما تكون متميز في قرايتك ، باش فلان يقول شو هكي قراي، و هكا ديما ناجح مع الأيام تكبر و تدخل للكولاج و تري عالم جديد مختلف ، مختلف علي كنت تراه في المكتب و يبدي الصحيح ، لازمك تقرا بالباهي باش تنجح باش توصل للباك ، شني الباك ياخي ؟ علاه الأمال لكل مربوطة بيه ، لا علينا كل شي في وقتو حلو كيما يقولوا ، الأيام تجري و السنين تفوت و تدخل لليسي ، و تقري و تبقي تخمم في عام الباك ، نجحت السنة و العام الجاي باك ، صدقني حياتك كلها باش تتبدل 360 درجة ، الناس لكل كلامهم شيولي عالباك ، الباك ، الباك ، البااك ، حياتك كاملة شتربط بالعام هاكي ،
ما تتفرجش راك باك ، ما تخرجش راك باك ، ما تضحكش راك باك ، سيب التليفون راك باك ، تلهي اقرا راك باك ، يمروا عليك عيشتك و الي يعرفك و الي ما يعرفكش يقلك الجملة الشهيرة " أيا اكبسلنا روحك سنا باك عاد شنفرحوا بيك " يتعداو ليمات و يقرب Bac Sport و أيامات اادخلة ، ترا الناس لكل فرحانة و تخطط و تحضر في حاجات مزيانة في كل معهد ، اما يبقي الخوف مسيطر علا الناس الكل رغم كل شي ، كهو تعدي الجو ، تعدي الباك سبور تبدي periode revision يمكن هاكي أكثر بريود تفهم فيها العباد لدايرة بيك ، و تعرف صحابك بالحق ، اه و لا سامحني صحابك الي باش يوليو موش صحابك ، كل واحد يجري علي مصلحتو ...
وفات بريود ريفيزيون ، اليوم يبدا الباك ، الي خدمنا عليه عام كامل ، الي تعبنا و شقينا باش ننجحو فيه ، تقوم تحضر روحك ، تبوس أمك و تسمع كان دعواتها ليك ، تحس الي انت مسؤول موش كان علي روحك ، مسؤول علي أمك ، بوك ، عايلتك الكل ،، صحابك ، الناس اي تشجع فيك لازمك تفرحهم ، ❤
يتعداو النهارات كيما الاشهرا و كل يوم تحسو اطول ملي قبلو ، وفا الباك ، فاد ، تاعب ، تستني هاك الريزلتا الموعودة شتفرح ..
الليلة ليلة الريزلتا ، التعب و الهم لعديتو عام كامل ، شيتحدد الليلة او كيما يقولوا مصيرك ، تستني ، تبكي ، تستغفر و تمشي ترقد و تدعي لربي ، الصباح تقوم تحل عينك ترا الميساج : مرفوض !
لا تنجم لا تبكي لا شي ، مصدوم ، تعب متاعك مشا الكل تعب عام كامل ، تقول الله غالب و تسكت ، في عينين الناس تلقى ليقلك عادي ما نجحتش ، دنيا ما وفاتش مازلت صغيرة قدامك مستقبل أما من داخل تلقاه يقول بعد تعب والديه و الخساير ما ينجحش ، و بعد أيامات تكتشف الي شطر العباد تذم فيك ، هاو ما قراش ، و كلام لا عد لهو و لا حصل يلوموك انت ديما ، و يقولوك اك الجملة الشهيرة " شوف اندادك جايبين 18 " أما سامحني علاه حد ما لام المنظومة التربوية الي لعبت بينا كيما حبت
لا علينا نحب نقول الي المنظومة في تونس منظومة فاشلة بأتم معني الكلمة ، يقتلو فيك حاجة اسمها ابداع ، لازمك تحفظ و تصب sinon ما تنجحش .. يخليوك نسخ طبق الاصل من بعضكم ، نفس المخ و نفس التفكير ،
و نحب نقول عمرو ما كان دفوار شيحدد مستواك و لا انت شنو ، و عمرو ما كان الباك يحدد اذا كان انت أنسان ناجح و لا أنسان فاشل ، هو مجرد أمتحان و موش أخر الدنيا كان ما نجحتش فيه ، تنجم تكون موهوب في حاجات أخري ما تخليش الباك ، يوقفلك أحلام ، ما تخليش الباك يكون عائق بينك و بين لتحب عليه"
