Slim Jerbia

26/08/2026

تعرفهم احا العايلة اللي بوهم ال كبير مات قاعدوا عشرية كاملة يتعاركوا على ميراث ارض كبيرة وكلها خيرات
بين كل مدة يموت واحد فيهم. يتلموا ياكلوا كسكسي ويتصالحوا
يقوم الأخ الكبير يقلهم باش نقسملك الأرض وكل واحد يأخذ حقه
عاد يحط يدو على احسن بلاصة ويقلهم النساء لا
و جماعة الخارج لا تو نتفاهموا معاهم
يعاودوا يتعاركوا عشرية اخرى
لين يموت الأخ الأكبر
وتتعدى ثلاثين سنة
وأما الأرض بور وفكوها الجيران وعملولها حيازة وصارت ملكهم

احنا في تونس تو في مرحلة ناكلو في كسكسي في دار الميت ونتعاركو كسكسي شكون ابن

وحديثنا قياس

26/08/2026

اول مرة الطبقات الكل في تونس تلتحم ببعضها غني فقير طبقة وسطى وعليا ودنيا
الجميع بلا ماء
تقريبا ستاج وحدة التنين

26/08/2026

🌍 على مرّ التاريخ، صارت برشة هجرات جماعية للشعوب، واحنا الإسلام أساسًا كبر وانتشر بالهجرة النبوية ﷺ 🕌.

💧 وقبل، كيف كان الماء ينقص والطعام ينقص 🌾، الشعوب كانت تتنقل وتهاجر بحثًا على ظروف أفضل. ونفس الشيء تعمل فيه الحيوانات دون توقف 🐦🐋🦌🐘 وغيرها.

🌍 ومصير الإنسان ممكن يكون نفس الشيء مستقبلًا.

🌡️ مستقبلًا، الهجرة باش تكون بدرجة أكبر لأسباب مناخية 🔥، وخاصة من مناطق ينقص فيها الماء 💧 نحو مناطق أكثر رطوبة 🌧️.

🛠️ وفي المستقبل، يلزمنا نفهموا أنو الدول اللي كيفنا مضطرة تتأقلم عبر إيجاد حلول عملية لمشاكلها، موش عبر الرعوانيات والسحر والشعوذة.

💧 وأنو كل قطرة ماء باش تكون مهمة، وباش نضطروا نحلّوا مياه البحر 🌊 ونعملوا الفسقيات والماجل في كل بلاصة، وأيضًا نرشدوا استهلاك الماء في المنازل 🚿.

☀️ ويمكن مع أزمة هذا الصيف، يلزمنا نتحمّلوا مسؤوليتنا ونحضّروا رواحنا لسنين جفاف أخرى قادمة.

🔥 وأعتقد أنو برشة شعوب أفريقية أخرى باش تهرب من جحيم الحرارة، وباش تتحول أرضنا لمجرد طريق عبور، لا أكثر ولا أقل.

سليم جربية

26/08/2026

طير جيب عشاك
التوانسة الكل، من مختلف المستويات، قاعدين يقطعوا من البلاد من قبل أزمات صيف السنة، واليوم تقريبًا باش نوصلوا لثلاثة ملايين تونسي عايشين في الخارج.

الناس فهمت اللي باش تمشي وتحسّن حياتها، يلزمها تهاجر، وأنه ما عندهاش الوقت ولا الرفاهية، لا هي ولا صغارها، باش تزيد تصبر أكثر.

وزادت الثورة وعدم الاستقرار السياسي من الإحساس اللي حاليًا ما ثماش مستقبل واضح لأولادنا: «خلّينا نسافروا».

والناس تقصد ربي للخليج وآسيا، وأخرى لأوروبا، للدول المعروفة وحتى لدول أخرى. وناس ولات تمشي لكندا وأمريكا وحتى لأمريكا اللاتينية، وثمّة صانعي محتوى في البرازيل وغيرها يبدّلوا للناس حتى طرق التفكير في الهجرة.

وها الآلاف اللي هاجرت، قاعدة كل عام تبعث في ملايين الدولارات لتونس: باش تبني، تشري عقارات، ولا تعاون شكون بقى من عائلاتها.

وحاليًا، ما عادش ثمة تقريبًا حد يقول: «لا، امنعوا الناس من السفر»، سواء بطريقة شرعية أو حتى عبر ركوب البحر. خاطر خلاص، صار ثمة نوع من الإجماع اللي تونس روّحت من الدور الأول، والإنسان يلزمو أرض جديدة وناس جدد وفرصة جديدة.

عندي بضع نصائح لأي حد يحب يسافر:

أولًا: من تو، ومهما كان مستواك العلمي، امشي تعلّم لغات. أبدا بالإنقليزية، وبعد لغة البلد اللي تحب تمشيلها. من غير لغة، باش تضيع وباش تخسر سنوات وأنت تتعلم. استثمر وقتك من تو في اللغة.

ثانيًا: كان ما عندكش حتى مهارة، وعندك ديبلوم ما يقدّم شيء البرّا، تعلّم صنعة وطبّقها. أي حاجة تنجم تنفعك في السنوات القادمة ومطلوبة في الدولة اللي ماشي لها.

ثالثًا: كانك سكّوتي، ودوبك دوب روحك وتمشي تحت الحيط، الغربة باش تكون أصعب عليك. من تو طوّر روحك، وتعلّم المهارات الناعمة، وكيفاش تتواصل مع الناس، وبدّل من شخصيتك باش تستحق تتأقلم.

رابعًا: كانك مفلس وبطّال وتاخذ في مصروفك من غير وضعك، اعمل شوية فلوس تحت راسك باش تستحقها. ما تمشيش وأنت ما عندك حتى احتياط.

خامسًا: كان عندك شكون في الخارج، ما تعملش عليه برشة. كان ضيّفك شهرين، يرحم والديه. الناس الكل تجري في الخارج، وما عندوش بالضرورة القدرة باش يصرف عليك ويعيشّك.

سادسًا: كانك عامل عامين، وعملت فلوس وسيارة وترجع تفرّح الميمة، افهم اللي هذاكا زمن آخر. حاليًا، كيف تعمل أوراقك، وتخدم وتعيش بالباهي، يعني سلكتها.

سابعًا: كانك ماشي باش تتزطّل، وتبيع وتسّكر وتتشطّح، وتعمل تيكتوك تورّينا فيه فلوسك، من المستحسن تقعد تحت الحيط في الحومة خير، خاطر كيف تدخل لقلب الغربة ما ثماش أمّك تجيبلك القفّة.

في النهاية، نشجّع أي إنسان باش يغيّر حياته وما يرضاش بالموجود، خاصة إذا كان الموجود سيّئ. أما نشجّع الناس زادة إنها تفهم وين ماشية وعلاش ماشية.

سليم جربية
أوت 2026

26/08/2026

ثمة جملة قالهالي جدي تو سنين
قلي التونسي كيف يعرف غدوة يوم القيامة
يغلي في سوم الكفن
تقريبا نفس الوضع حاليا دبوزة ماء بثلاث آلاف ونصف

25/08/2026

قبل كنا نجمو نمرر لنغم لسنية مبارك
تو حتى التلفزة قص عليها الضو

25/08/2026

مرحبا بيك

25/08/2026

24/08/2026

االطقس ليسا حارا ، الطقس جميل

🕰 الزمن اللي نعيشوا فيه اليوم هو زمن ما بعد الحقيقة.

🧠 يعني يكون ثمة حقائق واضحة والناس الكل تعرفها ، ولكن ثمة شكون مسيطر على وسائل الاعلام وعلى تشريع القوانين وعلى الرأي العام وعلى ساسة البلاد بحيث ينجم يعطينا حقائق أخرى بعيدة كل البعد عن واقعنا ،

🔎 هات نشوفو بضع الحقائق اللي نعيشو فيها.

🚍 عنا سنين ما عناش نقل في تونس سواء النقل الحضرى في المدن او النقل بين المدن والناس قررت انها تشري كراهب وترهن روحها باش تمشى لخدمة الهدف منها انها تخلص ديونها ، والناس نسات منظر القطار لانو تنجم تاخد كار لقابس او قفصة توصل بعد ثلاث أيام ، في حين دول العالم الكل تستثمر في القطارات والنقل لانها اول محرك للاقتصاد وللانتاج.

🎓 عنا سنين التعليم متاعنا تعب وضعف من ناحية البنية التحتية ، او من ناحية المناهج وقاعدين نشوفو في الاف من الأطفال ينقطعو على الدراسة والاف من المتخرجين شادين الحيط وبطالة تفوق 5 سنوات لأننا ما عملناش اصلاح تعليمي شامل وكامل ملائم لسوق الشغل والتغيرات التكنولوجية.

🏥 عنا سنين ، الصحة في تونس روحت من الدور الأول، القطاع العمومي تعب خاصة مع شيخوخة المجتمع ومع زيادة الامراض، والقطاع الخاص تغول والصناديق الاجتماعية شبه مفلسة والدواء الباهي مقطوع ويلزم تجيبو من برة او تنظر لروحك او لاحباءك يموتوا.

💼 البطالة استفحلت موش لدى الشباب فقط بل حتى لدى أصحاب الشركات اللي سكرت وعادي تلقى شكون بطال عمرو خمسين لانو تو عقود الشركات تسكر اكثر ملي تحل والقوانين اللي تحد من حرية الاستثمار تكبل في اقتصاد كامل وللأسف حد ما متلفت للبطالة ولا للانكماش الاقتصادي.

💡 الحقيقة انو وصلنا في صيف 2026 ، لا ماء، لا ضو ، لا خدمات وما ثمة شكون تسالو علاش ولا شكون يقلك انا المسؤول وهاهي المشكلة.

📌 هادي مجموعة حقائق.

🐦 ما وراء الحقيقة، انو العصافير تزقزق والجو صافي.

😊 ما وراء الحقيقة انو تونس تقدمت في مؤشر السعادة.

⚽ ما وراء الحقيقة انو الترجي ربحت النجم.

🎤 ما وراء الحقيقة انو امينة فاخت شيخت الجمهور وماجدة الرومي اطربت البقية.

📊 ما وراء الحقيقة ، انو مؤتمر الاستثمار حضره ثلاثة الاف وخمس مائة.

🎶 ماوراء الحقيقة نمر لنغم لسنية مبارك.

📷 يبدو ان بين الحقيقة وبين ما وراء الحقيقة ، هو ان نوجه عدسة الكاميرا الى حيث حجبت عيوننا.

سليم جربية
**أوت 2026**

24/08/2026

كل واحد فينا يتلفت يشوف خوه
كان حي. يحمد ربي
كان ميت يرحم عليه
بلاد ترمي في اولادها للموت