19/12/2019
ضرباتني الفيقة مع الوحدة دالليل..تلفوني كيصوني..يوماين هادي ماهضرنا..عرفني تقلقت عليه وعيط ليا باش يعتاذر كيف العادة..كنت كنتسناه يعيط..
- ألو..
- نتمنى تكوني بخير..
- الحمد لله..
- سمحي ليا عيطت ليك فهاد الوقت ولكن كنت محتاج نعيط ليك نطمأن عليك ونعتاذر منك على سوء التفاهم لي بدر مني..
- علاقتنا معندهاش وقت محدد مكاينش لا تأسف..يكفي أنك عيطتي هذا هو المهم عندي أما شي لاخر مكيهمنيش..
- شكرا حيت تفهمتي الأمر وبالمناسبة راني توحشتك وبغيت نقوليك شي حاجة..
- تانا كنبغيك.
- هههه باش عرفتيني غانقولها..
- ههه حيت يوماين هادي ماسمعتها منك وراني حافظاك... سمح ليا حيت تقلقت منك..
- لا ماوقع والو..يالاه سيري رجعي تنعسي..
- يالاه قولها عاد نعس.
- كنبغيك.
ضرباتني الفيقة مع العشرة ديال الصباح..نضت دوشت وجلست نفطر..كانت الواليدة كاتسنى فيا:
- هاد ليامات وليتي عاطياها غير للنعاس..
- كيف صبحتي أماما..
- بخير أبنتي..
(أنا كنفطر وهي كتشوف فيا)
- مالك أماما ؟
- سمعتك البارح كتهضري فالتلفون..كاع بنات الناس تزوجو ودارو مستقبالهم ونتي باقة حاضياه هو بحال ايلا قلالو الرجال فالدنيا..
- ماما لي فيا يكفيني..كل واحد ورزقو..
- واش معنديش الحق نفرح بوليداتك ؟
- ماقلتش هكا أماما حاشى..غير حاولي تفهميني..مانقدرش نعيش مع شي راجل خر من غيرو..نتي راك مراا أماما وعارفة اش كيعني انك تكون كتبغي شي حد وأبسط أحلامك تكمل معاه حياتك..نتي عارفة هادشي حسن مني..
فطرت وخرجت تقديت شي حاجة ورجعت للدار..من ورا الغدا عيط ليا:
- كنت بغيت نعيط لك صباح ولكن مساليتش مع الخدمة وقلت غاتكوني باقة ناعسة مبغيتش نبرزطك..
- لا عادي..كيف غادي مع الخدمة واش انت مرتاح واش كليتي شي حاجة ؟
- أنا بيخير..ياك مكاين باس ؟..بنتي ليا شوية كاعية..
- لا مكاين باس..غير عيانة شوية..
- اشنو عندك ؟..ياك ماشي شي حاجة ؟
- ماشي شي حاجة ماتشطنش بالك..
- نشوفك فالعشية ورا الخدمة ؟
- واخا..
فالعشية عيط ليا ومشيت تلاقيت معاه فالكافي كنا جالسين كنهضرو شوية قال ليا:
- قلتي ليا مكاعياش..اشنو واقع ؟
- لا غير كيبان لك..ماوقع والو..
- هي أنا مكنعرفكش كيفاش كتكوني ملي كتكوني كاعية ؟
- لا..غير..
- غير اش ؟ دوي ياك لاباس..
- غير مع الواليدة وصافي..
- مالها ؟
- راك عارف داك الديسك ديال الزواج عوتاني..باغة تشوف وليداتنا..
- يدير الله خير..
- كنتمنى..
فالعشية وصلني حدا الدار ومشى..من بعد يومين عيط ليا وعرض عليا باش نتعشاو فواحد الريسطورون..
وصل نهار الموعد..لبست وتأنقت وخرجت تلاقيت معاه ومشينا..تعشينا وجلسنا كنهضرو شوية قال ليا:
- جيتي زوينة اليوم..
- علاش مالي كنت خايبة ؟
- شوية..
- هههه غانضربك بكاس.
- ضوري شوفي وراك..
- اشنو كاين ؟
- غير ضوري..
(ضورت راسي نشوف مالقيت والو..رجعت عيني لقيتو جبد خاتم ديال الزواج حطو قدامي)
- تزوجي بيا ؟
- صدمتيني..ماكنتش معولة وماظنيتكش غاديرها
( كنهضر والدموع فعيني..قاطعني وقال ليا:)
- حبيبة راني سولتك واش تزوجي بيا ماشي قلت لك بكي..
- اه سمح ليا قابلة قابلة..
رجعت للدار ديك الليلة وانا غانموت بالفرحة..حتى ماما فرحات معايا وتراجعات على هضرتها..واش كاينة شي حاجة حسن من انك تكمل حياتك مع الشخص لي كتبغيه ؟..تعيش معاه وتشارك معاه أفكارك وأفراحك وحتى أحزانك..أهدافك وأحلامك ولحظاتك وذكريات الجميلة..واش كاينة شي حاجة حسن من هادشي..؟..ماكنظنش..فديك الليلة عيط ليا وحددنا موعد الخطوبة والزواج وبديت كنوجد راسي..
قبل موعد الزواج بسيمانة عيط ليا وتفاهمنا على كلشي وقال ليا:
- فين بغيتي ندوزو شهر العسل جزر الفيجي ولا المالديف ؟
- ندوزوه غير فالدار ونوفرو فلوسو لشي حاجة خرى اش بان ليك ؟
- لي بغيتيها هي لي غاتكون..وماضربي حساب لحتى حاجة..
- شوف بغيتك تعرف واحد الحاجة..انا لي كيهمني هو نكون معاك وملي نحل عيني فصباح نلقاك فجنبي اما شي حاجة خرى مكتهمنيش..
- هي ندير لك شي مفاجأة عوتاني ؟
- هههه واخا.
- اشنو نسميو ولادنا ؟
- ايلا كانت بنت نسميوها لي بغيت..ايلا كان ولد نسميوه لي بغيتي انت..
- سؤال آخر..كاتبغيني ؟
- كثر ماتصور..
- نتي عارفاني مكنتصورش..
- هههه باسل..
- عارفاني كنبغيك بلا ماتسوليني..
دازت ديك ليام ووصل اليوم الموعود..موعد الزواج..شحال وانا كنحلم وكنتسنى فهاد اللحظة بفارغ الصبر..موعد الزواج لي ماكتابش ليه يكمل..النهار الأسوء لي غادي تقلب فيه حياتي رأسا على عقب..كنت فرحانة ملي درنا مراسيم الزفاف..الغناء والرقص والزغاريت والفرحة فكل مكان..كولشي مبتاسم وفرحان بينا..والأجمل فالأمر هو بقى شاد فيدي وماحيدش عينو مني..عاملني بحال شي أميرة..كان كايبغيني وكان وفي معايا..داكشي علاش حلفت ليه انني عمرني غانكون لشي حد من غيرو وبلي غانبقى وفية ليه حتى تفرقنا الموت..
سالينا مراسيم الزفاف وخرجنا ركبنا فالطوموبيل ديالو وشدينا الطريق لدارنا الجديدة وحنا فرحانين..كنت كنتسنى غير ايمتى نوصلو للدار..عندي بزااف مانقوليه..باغة نعبر ليه على الفرحة ديالي معاه والحب ديالي الأبدي ليه..باغة نقوليه بلي منقدرش نعيش بلا بيه ومنقدرش ندوز شي لحظة بلا بيه..شدينا الطريق راجعين للدار..وصلنا لواحد الفيروج آخر حاجة شفتها هي واحد الطوموبيل جاية جيهتنا..دار جهدو كامل باش مانتساطحوش معاه..ولكن القدر كان عندو رأي آخر..تقلبات بينا الطوموبيل..ومعقلتش اشنو وقع..من بعد مدة فقت من الغيبوبة لقيت راسي فليرجونص..
حليت عيني عاد استوعبت..ضورت عيني كنقلب عليه.. هو مكاينش حدايا..بغيت نوقف ومقدرتش جسمي مساعدنيش..كنغوت وكنعيط بسميتو حتى واحد مابغى يقول ليا شي حاجة..دخلو عندي كيشوفو فيا وكيطمأنو على حالتي..كنسولهم فيناهوا واشنو وقع ليه وكولشي حادر راسو..ولكن الدمعة ديال الواليدة لخصات ليا كولشي..آه مات وماتت معاه حياتي..حاولو يعتقوه ما أمكن وماقدروش..صافي مات وتلاشى كولشي..تدمرات حياتي وأحلامي وتحطمت بمرة..مابقيتش قادرة نعيش وماقادرة ندير والو..بكيت وغوتت ولكن حتى البكاء والغوات مايقدروش يرجعوه ليا..حاولت نعيش ونكمل حياتي وماقدرتش..ماقدرتش نعيش بلا بيه وماصدقتش بلي بصح مات وخلاني.. فكرت ننهي حياتي ونلحق عليه باش نعاود نشوفو وماقدرتش..أنا ضعيفة..كنتقطع وماقادرة ندير والو..كنت باغة غير نعيش معاه ولا غير..كان هذا هو حلمي الوحيد..فكل مرة كنخرج فيها للزنقة ولا فأي بلاصة مشيت ليها كنحس بيه مراقبني وكايعيط ليا..كانضور مكنلقااهش..كنشوفو وكنتخايلو وملي كنضور باش نشوفو مكنلقاهش..أنا متأكدة بلي كيسمعني وكيحس بيا وكيشوفني واخا ماكاينش معايا فالواقع..حيت هو فقلبي وفعقلي وفذاتي..وكنتمنى شي نهار نعاود نشوفو ونعنقو كنقسم بالله مانخليه توقع ليه شي حاجة..غانبقى وفية ليه تال داك النهار لي غانتلاقاو فيه أنا وياه فالخلود...كان كيقرى الكتب ديال "كافكا"..لذلك قررت نشريهوم كاملين حيت تما غانلقاه..فوسط الكتوبة وبين الوراق والأسطر..غانكمل الرقصة بوحدي وأكيد هو غايشوفني..غايتفكرني وغيبتاسم..آه غيشوفني وغيبتاسم وغانحس بيه معايا..
بقلـم:زهير-قربوع
