16/09/2026
TPDC 2026 ||
Naibu Waziri wa Madini, Mhe. Dkt. Lemomo Ole Kiruswa, ametembelea banda la Shirika la Maendeleo ya Petroli Tanzania (TPDC) katika Maonesho ya Tanzania Geological Society (TGS) yanayoendelea jijini Mwanza, ambapo amepata maelezo kuhusu miradi mbalimbali inayotekelezwa na Shirika katika sekta ya mafuta na gesi asilia nchini.
Katika ziara hiyo, Dkt. Kiruswa ameelezwa kuhusu shughuli za TPDC katika mnyororo wa thamani wa mafuta na gesi asilia, ikiwemo utafutaji na uendelezaji wa rasilimali, uzalishaji, uchakataji na matumizi ya gesi asilia katika kuchochea shughuli za kiuchumi na maendeleo ya viwanda nchini.
Akizungumzia matumizi ya gesi asilia, Dkt. Kiruswa ameshauri kuwa baada ya kukamilika na kuzinduliwa kwa Bwawa la Mwalimu Nyerere, kiasi cha gesi ambacho kitapungua kutumika katika uzalishaji wa umeme kiangaliwe kwa ajili ya kuelekezwa kwenye uwekezaji wa Kiwanda cha uzalishaji wa mbolea nchini hatua ambayo itawezesha upatikanaji wa mbolea ya uhakika itakayochechea ukuaji wa sekta ya Kilimo nchini.
Ushauri huo unalenga kuendeleza matumizi ya gesi asilia katika maeneo yenye tija kubwa kiuchumi, hususan katika kuongeza uzalishaji wa pembejeo za kilimo, kupunguza utegemezi wa bidhaa zinazoagizwa kutoka nje na kuimarisha mnyororo wa thamani wa gesi asilia nchini.
