05/30/2024
Impilo yethu isesandleni sakhe.
Ngihle ngibone ngokuvimba uzibandlela wonke ukuthi lonyaka ssizakudla inqweqwe zomlomo.
utshangane agwcale anganyakazi aze elekane amaviki amathathu???? hayi umangoye uyasola....kunuka santungwane.
Woza mvimbi kaNhlolanja phela sidle umsosobiyane...izulu ungalibona....kekerere,sekuyindlala njalo. hawu bakwethu, sithatheni sihlanganise lani nxa sekunje....
inkinga mina angilayo kangako kodwa la amatsiyane alandela ngemuva ngizawasa kobani.
Emasimini kumhlotshana nke....
phansi ligwadula komile...
izitolo kukhala ibhungane umuntu uhlangabezwa yimiqulu yamaphepha okusebenzisa esambuzi ngingazi ukuthi umuntu uya njani lapho engadlanga lutho...sekuyikho okuthiwa loba singaboni isiphofu kodwa nxa sisegangeni senza sithalaza.
Ziyatshovana ezikaMdali insuku ezkazilani lobuzima obuphezuz ekwabantu bakhe. Woza sidlo seNkosi ungawabona amathanga!!!! lilihlo lentwala.
Ngokuthiwani ke lokhu...sekukubi ke la, inkomo idl'iyembe.Yebo ngiyasebenza kodwa isithenga isinkwa nje qhaaaaa. sona siphi, sifumbathe ubone, iqebelengwane lingumfana.
Ngazingaphi ke nxa kunje....
"Kanti baba yindaba lingake lizame lani khonale lapho okuyakhona iabanengi njengoba nje kungamanga kuhle, angiboni kuhle....ungathi sizafelwa ngabatwana" kutsho intombi engizalela izibulo lami ngezwi elithobekileyo ongeke uliphikise loba ungayithandi into yakhona, kungangcono ukuvuma uyebonkosi.
Uyabe unganani?? ngazithumela ngesiminya zelekene zimbili ezicela ithuba lokuphumula esbhedlela esikhulu. Ngokuthula ngaziphosela kwekaZupco phela yiyo ebivumela incwajana yokuhola ibe yiyo emele iviza.....bekusesenzinyana ukungena ikwaMsholozi.
Quuuu ngendlondlo enopheph'ekhanda yangithi qithi kwanyama kayipheli kuphela amazinyw'endoda...ngathola sekuphela amazinyo mina inyama ingabonwa sizidlela eziduma ezangaphakathi.
Woza msebenzi wobunesi, ungawubona? indlala zale...ububhare bheeee ikhanda phithi...
Ngenzenjani manje, kude emuva kude phambili kanti kukhuphukile njalo.
Nkriii nkriiiii lukhale lububule ucingo ngingalwazi lakulwazi...
watsho suvukile owesipholisa umsebenzi.
Ngenzenjani nkosiyami,abatwana balambile...kambe yena lumfowethu uzabekezela kuze kube nini umtakababa yena ezisebenzela ukuvuba udaka nje vo, hayi ngaziphosela ngimadolo nzima kambe umuntu ejayele ukusebenza ehleli, Ngen'omunye, phela babizwa njalo ezibhedlela lapha.
Yajabula yafa inkunzimalanga isiphakathi kwemnyama njengempolompolo indwindwi kwazise yisipholisa sezinga elinganeno engingalibiza ngebutho lomvikela. Ngitsho phela ngoba kuvikelwa ukutshotshwa kwempahla hatshi ubugebengu obehlukeneyo lobu.
Kusemathathakusa ngehola lesine. kusemnyama khaca lempisi ingadla umniniyo, angitsho laba abafana abathatha ngamandla badla ubhedu emakhoneni amabhilidi asegoli luthuli.
kodwa kuzathiwani ibhusumani lifuna indoda emsebenzini ngesikhathi. kungenwa ngobani kanti....ihola lesithupha kubizwa u"All in order" akudlalwa kusegoli lapha, kwabuywa.
04:30 iyaphuma inkalakatha,ithi nxa isemnyango weflat ithalaze ngapha langapha phela akwaziwa kungahle kukuqagelane okungabafana.Zisukume inwele kodwa angiboni lutho olusolisayo.
njengendoda ngenwaye impumulo ngibhekise amabombo phambili ngiqine ngomncane umthandazo wokuvikelwa . Jinko jinko ntshenkelezi ngamakhona yimi lwana ngiseqa uclaim, tekele ngopretoria ngilanda utwist....phela zibizwa ngawesingisi lesibhunu angazi lani...izitalada zasegoli......
