29/11/2022
Gezuar Shqiperia ime! Shqiptaria jone.
NËNË SHQIPËRI
Më lër të bie në prehërin tënd të ngrohtë
O hallemadhja ime shekullore!
Të puth duart e tua , më të mirat në botë ,
I ngazëllyer të hesht me heshtje foshnjore;
Duart e tua që u rregjen nga puna
Dhe gishtërinjtë që zunë kallo nga këmbëzat e dyfekëve ,
Dhe supet që u varen nga xhokja e nga guna,
Dhe mesin që u hollua nga gjerdanet e fishekëve ,
Dhe ballin që rrudh e u lërua nga mendimi,
Dhe beben e syrit që u mpreh nga shënjestra ,
Dhe kembët që u zmadhuan nga ecja e mundimi .
Dhe qerpikët që u dogjën nga baruti në shkrepa...
Ti sytë lan në mëngjes me ujin e krojeve të maleve
Ti llërët lëmon në mëngjes me shkumën e deteve,
Ti faqet fshin me peshqirin e madh të livadheve,
Ti flokët lyen me lengun e luleve të bjeshkëve …
Dhe çdo mëngjes bëhesh më e re dhe përze zhubra e
rudha
Ne rrimë në prehrin tënd e dorën na shkon në flokë
Thinjat na fshin kur gjunjët na dhembin nga udha,
Lodhjen na heq kur zgjuar na tretesh mbi kokë ...
Qendroj para teje,
Ja tek më ke,
Në krahët e tua,
Mua,
Birin tënd , shëmbëllimin e qënies tënde,
Atë që tha sa hapi sytë
në djep:
"Te dua!"
Dhe fjalën e peshës së rëndë e ruajten malet e rëndë ..
Gjithë dashuritë për nënat që janë e do vijnë
Në prehrin tënd të madh i kam vënë ,
Gjithë dashuritë për gratë , për shokët e miqtë
T'i kam sjellë t'i ngrohësh o nënë !
Jeton dashuria për ty, se birin tënd s'e thau
civilizimi
S'e thau shekulli i atomit dhe i zbritjes në hënë ;
Në buzët e plasura s'iu vyshk belbëzimi ,
Bëlbëzimi i foshnjes që përgjërohet për nënë .
Biri yt di të ulet në sofren që shtrojnë fshataret
në oborr,
Sic ulet në banketet që shtrojnë kryeministrat;
Biri yt di të hyjë në laboratorin termobërthamor ,
Sic hyn në arën ku zgjatin mustaqet misrat...
Çdo gjë që më dhe trashegim e kam mbajtur
Kudo që kam shkuar ,
Kudo që kam vajtur.
Dritero Agolli
