Beleef Bonnie Brae en sy Bure

19/09/2023

Tannie Suikerbekkie is vandag 82 jaar oud. Baie geluk met die verjaarsdag.✨

12/08/2023

Wie is Soretha?
Ek woon in Bonnie Brae en ek deel graag die stories van Bonnie Brae en sy mense. Saterdag oggend, 19 Augustus stel ek myself bekend waar Bonnie Brae en Dan King kruis. Kom sê gerus "hallo" en kom deel jou storie met my. Kyk uit vir hierdie tekens.
Soretha Coetzee
0764828045

17/07/2023

Oom Hans en die Veterane
Bonnie Brae het die interessantste inwoners met die interessanste stokperdjies. So stap ek verder deur my buurt en ek ontmoet die Langhoff familie. Oom Hans en Tannie Mieka Langhoff woon nou al 25 jaar in Bonnie Brae en saam met hulle seuns Rudi, Emrich, Gustav en Ernést het hulle ‘n passie vir veteraan motors.
Oom Hans se pa, Fritz Langhoff het in 1948 ‘n 1938 Hupmobile gekoop en hierdie motor is vandag nog in die Langhoff familie. In 1981 het die gogga Oom Hans gebyt en van daar af was daar geen keer aan hom nie.
Name soos 1938 Hupmobile, 1935 en 1937 Terraplane, 1936 Ford en ‘n 1939 Chev word genoem. Volgens Oom Hans is daar net twee 1938 Hupmobile in Suid Afrika en hulle staan in Bonnie Brae. Hy restoureer hulle self en aangesien die meeste van die onderdele lankal nie meer beskikbaar is nie, maak hy dit self. Akrielhars (resin) word gebruik om die ligte mee te giet, glasvesel vir die wieldoppe en Oom Hans vertel my dat een ‘Wit Muur’ band jou R10 000 uit die sak gaan jaag.
Op geleenthede soos matriek afskeid, verjaarsdae en troues, word hierdie motors blink gepoets om die dag ekstra spesiaal te maak.
Kontak my gerus om met die Langhoffs in verbinding te tree vir ‘n rit in een van hierdie spoggerige veterane.
Soretha Coetzee 0764828045

11/07/2023

Dit is amper weer tyd vir lekker tuin maak. Ek sien uit daarna om my buurt se lente tuine te kan afneem en met julle deel

12/04/2023

SUIKERBEKKIE
Ek loop onlangs vir Tannie Anne Smit raak by die Tack Shack hier naby Bonnie Brae en sy vertel my haar storie. Sy het omtrent so 10 jaar gelede finaal afgetree en het gesukkel om “soos ’n oumens by die huis te sit”, haar eie woorde. Sy was toe al 73 jaar oud en het besef sy is hopeloos te jonk om af te tree. Sy besluit toe eendag sy gaan ‘n brood se toebroodjies maak en kyk of sy dit kan verkoop. Sy pak haar toebroodjies in ‘n mandjie en stap Durbanville se strate in. By die derde besigheid waar sy instap, verkoop sy haar eerste toebroodjie en binne ‘n paar minute is haar mandjie leeg. Die volgende dag maak sy twee brode en dis nie lank nie, toe is een mandjie te min. Later het sy begin lekkergoed maak soos fudge, bruintjies, suurlemoentjies, klapperys en vele meer. Die lekkergoed verkope neem toe later oor en sy besluit om die broodjies te laat staan. Omtrent so twee jaar gelede gee een van haar kliënte vir haar ‘n borsspeld van ‘n suikerbekkie en sê dat dit haar aan haar eetgoedjies laat d**k. Van daar af staan sy bekend as Tannie Suikerbekkie. Vandag, 7 jaar later, op 81, stap sy nog steeds met haar mandjies wat die heerlikste tuisgemaakte lekkernye bevat. Wel gedaan Tannie Suikerbekkie, jy het my sowaar inspireer.
Soretha Coetzee
0764828045

30/01/2023

TROTS OP ONS TUINE
Ek stap gereeld met my hond in Bonnie Brae se strate en ek kan nie help om al die mooi tuine raak te sien nie. Alhoewel dit al somer was, was daar nog heelwat plante in die blom en ek het so ‘n paar van hulle op kamera vasgevang. Met die betrokke eienaars se toestemming, deel ek dit graag met julle. Hier en daar is daar ‘n tuin wat nie mooi versorg is nie, maar in die algemeen lyk ons tuine goed en ons kan trots wees op ons buurt. Ek kan nie wag om in die lente uit te gaan en al die bolle, bloeisels en blomme wat ontwaak uit hulle winter slaap, af te neem nie. Ek sal dan heelwat meer tuine afneem en met julle deel.
Soretha 0764828045

15/11/2022

Manie en Marie Bosman
Twee van Bonnie Brae se geliefde inwoners, Manie Bosman (79) en Marie Coetzee (76) woon elkeen in twee afsonderlike komplekse, wat reg langs mekaar geleë is. Hulle ken nie mekaar nie. Een oggend in Oktober 2021 besluit Marie dat die weer net reg is vir n stappie af Spar toe. Die sonnetjie skyn te lekker met hier en daar ‘n paar wolke in die lug en Marie durf die pad te voet aan. Toe sy egter ‘n rukkie later by die winkel uitkom, sien sy dat die wolke begin saampak en oppad huistoe, sak daar ‘n reënbui uit en Marie reën sopnat. Skielik hou daar ‘n motor by haar stil en die man agter die stuur sê sy moet inklim. Manie. Eers wil sy nie inklim nie, “want ‘n mens klim nie by vreemdelinge in ‘n motor nie”, maar Manie vat nie nee vir ‘n antwoord nie en baie huiwerig klim sy tog in. Hy gaan laai haar by haar huis af en word ingenooi vir ‘n koppie koffie om darem dankie te sê vir sy moeite. Dit was die eerste van vele oor-en-weer koffies en voor hulle, hulle kom kry, is daar liefde in die lug. In Desember 2021, verklaar Manie sy gevoelens aan haar en dit blyk sy voel dieselfde. Januarie 2022, na ‘n heerlike uitstappie op Tafelberg en ‘n lekker uit-ete, vra Manie om haar hand en op 1 Mei 2022 beloof hierdie twee lieflinge trou aan mekaar in die kerk. Haar seun, Rudi het haar die paadjie af gelei waar sy in haar pragtige ligte pienk rok, wat sy self gemaak het, haar bruidegom Manie tegemoet loop. Lank lewe die Liefde.
Soretha Coetzee
Sel: 0764828045

07/11/2022

'n Paar vriende het harte oopgemaak en nuwe stoele geskenk sodat die Heilige Tabernakel gemeente in Scottsdene meer mense met Die Woord kan bedien. Toe ons daar stop om dit te oorhandig was hulle juis besig om die lied, "Wyl U ander seën o Heiland, seën nou ook my..." te sing.

25/10/2022

25/10/2022

EREDIENS IN SCOTTSDENE
Ek was so bevoorreg om deur Pastoor Brian Peters en sy vrou Sophia, genooi te word as een van die gas sprekers by hierdie besonderse gemeente by een van Bonnie Brae se Bure, Scottsdene. Aangesien dit Borskanker maand is, het hulle ‘n spesiale diens aan hierdie gevreesde siekte gewy. Foto’s van geliefdes wat hulle stryd verloor het, onder andere díe van William Reid asook van ander wat nog veg, word uitgestal.
Waar baie van ons elke Sondag in ‘n groot kerkgebou sit en aanbid, verkondig hierdie mense Die Woord uit hulle woning wat hulle so ingerig het, om almal te kan akkommodeer wat wil kom luister. Stoele word buite uitgepak en mense kom uit alle rigtings aangestap om te kom aanbid. ‘n Groot mat word op die grond gegooi wat dien as ‘n platform. Met slegs ‘n klawerbord, ‘n tamboeryn en ‘n paar mikrofone, loof en prys hulle die Here se Naam terwyl hulle sing en dans op die ritme van die musiek. Talentvolle mans, vroue en kinders neem deel met alles wat hulle het, om Sy Naam mee groot te maak.
‘n Seuntjie neem die mikrofoon en sing ‘n liedjie vir sy Mamma, wat ‘n jaar gelede die stryd teen kanker verloor het, ‘n jong meisie voer ‘n spesiale danspassie uit vir kanker lyers, Evangelis Bergh bring ‘n kort boodskap, Suster Juliana Koopman van Tygerberg Onkologie lewer ‘n praatjie oor hoe ons gesond moet lewe en ek kon ook my kanker ervaringe met my dogter, met die gemeente deel.
‘n Kort getuienis met ‘n belangrike boodskap het uitgegaan, “Kind van Kraaifontein”: ‘n Jong man van Kraaifontein, wat vasgevang was in ‘n bende, het op ‘n dag besluit om sy hart vir Jesus te gee. Vyf dae later het hy sy lewe in bende geweld verloor. Ons almal kry ‘n b***t om te sterf, maar ons weet nie wanneer nie. Soms laat Hy ‘n siekbed toe en dan het jy nog kans om reg te maak, maar soms kom jou b***t skielik en onverwags. Die boodskap: Ek kan nie vir jou sê hoe jy jou lewe moet lei nie, maar sorg dat jy jou hart vir Jesus gee sodat wanneer dit jou b***t is om te sterf, jy nie verlore sal gaan nie.
Soretha Coetzee
Sel: 0764828045