Kleurvolvrou

15/09/2024

Ek soek ‘n lappie aarde… Liewe Vader…

om ‘n Kliphuis op te bou… daar waar die teerpad en sein vir eers gaan ophou..

‘n Stukkie grond, waar mens weer kan kaalvoet stofpad loop…

Waar jy jou eie beker weer volmaak met goeie koffie en nuwe hoop.

Niks fêncy,
niks groot… net ‘n KLEIN stukkie Noord waar mens kan kom rus by U strome.. wanneer ons vlug van die gejaag en die wêreld se drome…

Daar waar dit stil is…
U en ek… en die wind deur die bome.

Mag elkeen wat in die Kliphuis kom kuier, onthou van U, Yahshua, van U bloed… U genade en van die Brood wat U daagliks saam met elkeen breek.

Gee tog ook dat elke kind wat hier kom, rustig sal wees - sodat dit nie vir hul ouers nodig is, om in hierdie diepe vrede, hulle te wil neuk! 😜😘

13/06/2024

AS HULLE BY DIE HUIS KOM…

Vroegoggend vang my oog weer die tekkies wat na tennis by die deur gelos is gistermiddag, die skooltas en hokkiestok wat nou maar vir die vakansie sy staan daar moet vind want ‘n ma praat mos oor hierdie dinge met die mure!! … MAAR vanoggend se eerste gedagte toe ek dit sien, is anders, dit is een wat op my hart druk om vir jou te sê… WAARDEER DIE URE!

As jou kind ook by die huis inkom met ‘n warrelwind agterna… skoene uittrek, op die bank val en vra “Wat eet ons…maaa?!”…ONTHOU… en bind daai “lieflike-chaos” GOU in jou hart… want daar gaan ‘n dag kom, vir jou en vir my… ‘n dag in die toekoms waar ons gaan WENS daar lê nog tekkies by die deur, maar dan is hul kinderjare reeds verby…

As hulle by die huis kom… IS JY GESEËND!

Druk daai warrelwind of blommekind en los maar die skoene vir eers by die deur… vir tenminste nog hierdie een keer.

28/05/2024

T Y D - wat presies is tyd?

Niemand van ons het deesdae TYD vir niks en tog is TYD die enigste ding waarvan niemand van ons kan wegkom nie…

Hierdie DRIE letters bepaal ons dae en waar ons wanneer moet wees… dit bepaal tot wanneer jy kan lê, moet werk of hoeveel bladsye jy nog van jou boek kan lees!

Tik… tok… tik… TOK!

“Hoe gaan dit?” Vra mense mekaar elke dag, oral, uit gewoonte en goeie maniere mos…

“Goed dankie self?” was die antwoord amper altyd terug.. maar nie meer nie!

“Besig besig..” of “Mal dankie” en “Lekker besig en by jou?” kom die antwoord nou!

Hoe het ons hier gekom en hoe vinnig beweeg die aarde deesdae dan om die son? ‘n Jaar het soos ‘n leeftyd gevoel… die wag van een Kersfees na die volgende - onthou?… maar nou is dit net ‘n oogwink…

Jy onthou nog die Kerstafel en poeding… die familielid wat jy nie wou “koebaai” soen nie en NOU IS DIT SOWAAR AS VET ALWEER JUNIE!

Dit is “scary” as ons besef hoe vinnig alles verander, hoe groot die kinders raak en dat ons absoluut niks daaraan kan doen nie...

T Y D…

Maak die beste van jou DRIE LETTERS vandag… en nee ek praat nie van die DRIE LETTERS wat jou MA bedoel as sy sê jy moet gaan sit op dit nie… Ek praat van JOU T-Y-D!

ONTHOU…

Jy gaan nooit die dag oor hê om eerder te speel as te werk nie..

Jy gaan nooit die werk onthou wat jy eerder gedoen het as om TYD in die middae, saans of naweke saam met jou kind te spandeer nie.. Jy gaan wel eendag wens jy het dit nie eerder gedoen nie!

Vir elke “JA” wat jy sê vir iets of iemand… sê jy “NEE” vir iets of iemand anders - maak SEKER jou JA’s steel nie jou gesin se TYD nie…

Wanneer iemand jou vra hoe gaan dit - sê tog asseblief net dit gaan “BAIE GOED!” of “Geseënd dankie!” Gooi Hulle bietjie met positiwiTEIT…

Ennn laaste, maak TYD terwyl jy kan vir dit wat tel… bêre jou laptop, bêre jou sel… SIT OP JOU (ander) DRIE LETTERS en speel saam met jou kinders of gesels met jou man/vrou… drink ‘n koffie saam jou pel… Daai lastige nommer… kan môre weer bel!

KleurVolVrou..
(tydens middernag borsvoed-en-tee-tyd)…
oor-en-uit! 😎

03/05/2023

24/04/2023

Tyd vir tee!

03/04/2023

Vet PRET… en groot dinge wat binnekort die Tuinroete tref..



ACE Models Mossel bay & George

14/03/2023

'n Gedig vir elke
KleurVolVrou

Ek skryf ‘n gedig oor jou,
jy is ‘n inspererende vrou
‘n roos waaraan mens kan vashou,
dis hoe almal jou beskou.

Iemand wat my kan help en leer,
selfs kan bystaan in tyd van seer.
Vertroostende woorde, sag en teer,
jy sien nooit op iemand neer.

Raad het jy om ‘n wond te genees,
te verwyder ‘n doring uit die vlees.
Verstommend is jou passievolle gees,
nog meer, jou kreatiewe idees.

Blomme is vir jou niks nuut,
jy kan rangskik, met selfs een riet.
Uit iets oud skep jy iets nuut,
tot ‘n geroeste yster kan jy so geniet.

Jy wys my hoe om te bak en brou,
om room te klop, sommer gou.
Hoe om te stik ‘n soom, ‘n mou,
hoe diep om ‘n plant se g*t te grou.

Wat om te maak met ‘n plein wit blaai,
wanneer om nuwe blomme te saai.
Van ‘n lappie maak jy iets so fraai,
hoe jy dit doen kan ek net raai.

Ek wonder soms,
is jy by die huis net soos ons?
Moet jy ook koskook en bed op maak,
om nie eers van skottelgoed te praat?

Hoe kry jy dit reg om ma te wees en vrou,
en dan nog by al jou verpligtinge te hou?
Raak jy ook moeg, raak jy ook flou,
Jy is ‘n wonder mens, jy is ‘n KleurVolVrou.

- deur Lyzette Botha

18/12/2022

LEESFEES…

Nog ‘n LEKKERTE van DESEMBER is natuurlik, behalwe vir al die speel en sport(s), die boeke wat ons kan afstof…

Van hulle word deur die jaar gekoop en gebêre nét vir Desember… en ander dra mens vir jare…

… en dan op ‘n dag in Desember, wanneer jy reg maak vir die groot LEES… kry jy só briefie voor in… na 17 jaar!

Dankie liewe Carmen - dié is BAIE spesiaal! Ek dra jou saam.

16/12/2022

GEORGANISEERDE
CHAOS -

Hierdie blad was nog BAIE stil die afgelope paar maande, maar tussen deur al die GEORGANISEERDE CHAOS van 2022… is KleurVolVrou tog stadig maar SEKER besig om vorm en baie KLEUR te kry… en ons sien baie uit na Mei…

Met groot DROME..
baie planne en ‘n passie vir VROUE-harte, die vuur agter alles!

KleurVolVrou gaan in 2023 nuwe deure oopSKOP vir vriendinne wat vergeet het om te vertrou, wat nog aan die wêreld se opinies vasKLOU en lankal ophou soek het na die sleutel… Vriendinne wat VERGEET het Wie hul geskep het en hoekom…

Ek sal nooit Tasha se woorde vergeet toe sy die EERSTE keer my kantoortafel gesien het nie… Dit was op hierdie dag… (foto 1)..”HOE DE FLIP KRY JY GEWERK?”

Ek het daai dag my tafel gaan vergelyk met dié van Albert Einstein en Steve Jobs 🤣🤣… (foto 2 en 3) toe voel ek beter - ek kan hulle ‘n go gee!

Vir die wêreld is hierdie totale CHAOS… maar vir my is hierdie..
Ma-wees
Vrou-wees
Entrepreneur-wees
Diensbaar-wees
Dogter-wees
Kunstig-wees
Lief-wees
Skeppend-wees
Koningskind-wees
Boekhouer-wees
Sussie-wees
Sielsoeker-wees
Dankbaar-wees…

Die wêreld sien choas… maar JESUS sien my KLEURVOLLE-VROUE-GEES want Hyt hom vir my gegee…
… vir ‘n rede. - Jer 29:11

Mag JOU choas vir jou sin maak… en mag jy kosbare herinneringe saam met jou gesin maak hierdie volgende paar dae..

Hê ‘n wonderlike Kerstyd en mag 2023 JOU jaar wees - in alle aspekte en op alle gebiede van jou lewe.. mag dit die jaar wees wat jy jou KLEUR terugvat… en jou rede, onthou!

Jesus, ons YAHSHUA, is ongelooflik lief vir JOU.

Liefde groete,
Chané