Engaz Services

26/05/2026

19/03/2026

كل عام وفريق عمل وجميع عملاء شركة إنجاز بخير ، عيد فطــر سعيــد .

22/12/2025

لما الشركة توظف مهندسات فريش

17/09/2025

تعالى اعلمك ازاى تنضفى مطبخك... و الطريقة دى تنفع لو حالته عادية و ايدك فيه او حالته عاوزه انبوبة اكسجين 😆
مبدأيا كده هتجهزيلى يا اختى مياه سخنه.. كاتيل بقا او تسخنى ف حلة او من الحنفيه المهم مياه سخنة
ثانيه صابون مواعينك و ازازة خل ب ٥ جنيه
بصى هتنفذى اللى هقوله بدون تفكير احنا منضفين فوق ال 1200 مطبخ و بنديلك الخلاصة
تجهزى كمان (كيس قمامه)
١- اول حاجه.... اوعى تبداى تنظيف و الارض تحتيكي مش نضيفة
لمى كل بواقى الاكل و المخلفات و الزبالة الواقعة فالارضة و اكنسى كويس و ارميهم فالكيسة.. الخطوة دى مهمه اوعى تطنشى..
٢- كده جاهزين للشغل بصى بقا .. هنغسل كل المواعين اللى فالحوض الاول او عالرخامه ... هنجيب الصابون و نعمل طبق متوسط الحجم وفيه مياه سخنه و صابون مناسبين و معلقتين خل... و ده هيساعدك فتنظيف اى دهون لازقة او قديمة
لو حلل او طاسات و الدنيا صعبه يبقى لازم باور للدهون
غسلتى كل المواعين و الدنيا راقت بصى بقا
٣- كل اللى اتغسل ده و اى حاجه على رخامة المطبخ كلها تطلع برا المطبخ تتحط على اى مكان لغاية ما نخلص
٤- ارجعى المطبخ فضى المطبخ من جوا الدرف (لو محتاجه)
هننزل التراب اللى جوا و فوق المطبخ...ولو في بقعه او اصفرار يبقى بدون مياه كتير يادوبك فوطة و مياه و ندعك براحه و ننشف
و بعد كده ملمع خشب و (فوووطة ناااااشفة )
هنلمع المطبخ و نرص فيه حاجتنا نظيفة
🦧 تعالى بقا للحيطة و الاجهزة 🦧
بنخش على الحيطة لو حالتها عادية نكتفى ب مياه سخنه و صابون و خل و ندعك 🥸
لو ضايعه و مدهننه اديها باور و سيبيها لمدة ١٠ دقايق بعد كده بنصبن ب مياه و صابون و خل 👌
بنعمل الشفاط مع الحيطة 🫡 لو مبتعرفيش تفكى امه متفكيهوش
بعد كده... 🥰
بنفرز التلاجه و نطلع كل اللى هيترمى و مش محتاجينه نرميه
و بعد كده هنفضيها خااااالص و نصبنها و نشطفها و نفليها و نعيد رصهااا
البوتوجاز بقا... هنشيل الشعل على الرخامه و نفضى الفرن
و على حسب حالته هنتعامل .... ندعكه دعكه تتوبه و ننشفه و نقفله و نركب الشعل
و هنا يجي دور اخر حاجه الرخامه و الارضية
تبقى ست فاشلة لو لسه معرفتيش هنا هتعملي ايه سلامو عليكو 😂

20/06/2025

#قواعدالتعامل مع الصنايعيـة :

1- الصنايعي تناديه ب (عم فلان)، أو (أسطى) أو (معلّم). بلاش أستاذ فلان أو عمو فلان عشان التكلفة هاتبقى الضعف.
2- نبرة صوتك وانت بتكلم صنايعي في التليفون لازم تبقى عالية ..كأنك بتنادي عليه من مكان بعيد .. لو نبرة صوتك ناعمة هايحاسبك بالمتر ..
3- بتاع المقطورة اللي بينزلك رملة تلبس له بنطلون بيتي واسع عليه ٣ خطوط بيضا من الجنب، ومتعاص نقط بوهية، وتيشرت قديم قصير بالعافية جايب كامر البنطلون.
هاتلبس رسمي قميص وبنطلون هايجيبلك رملة بيضا مش صفرا، ومن الشونة مش من المحجر ..
4- شاي للصنايعية.
5- طريقة لبسك قدام الصنايعي بتحدد مدى خبرتك في التعامل معاهم ..
6- دخان الصنايعي معناها فلوس إضافية، مش لأنه عمل حاجة زيادة غير اللي انتو متفقين عليها، انتو اتفقتوا على فلوس، إنما هو عايز دخان مش فلوس! اللي هي فلوس مش دخان !
7- شاي للصنايعية.
8- لو محتار بين الصنايعية ومش عارف تحدد من أحسن وهايطلعلك شغل أحسن، خليك في الصنايعي اللي صوته محشرج.
9- شاي للصنايعية.
10- شاي تاني.
11- النقّاش دايماً فاكر انه مش هايعوص السيراميك، ودايماً بيعوص السيراميك، فحط شرط في اختيار النقاش انك تحط كرتون شكاير فاضية أو مشمع عالأرض، واللي يوافق عالشرط هو اللي يشتغل معاك.
12- اعمل تيستات صوت، وڤوكاليز عشان تقيس درجة حشرجة صوت المبلط، غالباً ده هو اللي هايظبطلك الميول.
13- شاي للأفندية.
14- في صنايعية بيجيبوا معاهم عيال في رابعة ابتدائي عشان يشخطوا فيهم قدامك ويثبتولك انهم معلمين، لأ، دول مش معلمين ولا حاجة ..
المعلمين الصح هما اللي بيشخطوا في عيال في تانية إعدادي وانت طالع.
15- شاي للحضرات.
16- لو انت بيزنس مان أو موظف حكومي ، ومش عايز كل شوية تروح تسحب فلوس من الماكنة، سيب الفيزا مع الصنايعية وعرفهم الرقم السري.
17- سيب معاهم فيزتين : فيزا المرتب، وفيزا الدخان.
18- شـــ(شاي للصنايعية)ـــاي للصنايعية..
19- الصنايعي اللي بيغمض عينه نص تغميضة وهو بيشرب سجاير أكتر خبرة من اللي بيشربها وهو مفتح عينه عالآخر، واللي بيرد عليك من تاني مرة هايطلعلك شغل أحسن من اللي بيرد عليك من أول مرة.
20- شاي للصنايعية.