24/05/2026
ඊශ්රායලයේ වෙසෙන ශ්රී ලාංකික අපගේ විදේශ ගමන් බලපත්රයක් අස්ථානගත වීමකදී අනුගමනය කළ යුතු නීතිමය ක්රියාපටිපාටිය දැනගමුද?
ඊශ්රායල්වල වැඩ කරන අපේ ලාංකිකයන්ට තමන් කවුද කියලා ඔප්පු කරන්න තියෙන වටිනාම ලේඛනය තමයි පාස්පෝට් (විදේශ ගමන් බලපත්රය) එක. විශේෂයෙන්ම මේ දවස්වල ඊශ්රායලයේ පවතින ආරක්ෂක තත්ත්වයත්, එහේ තියෙන දැඩි නීතිරීතිත් එක්ක පාස්පෝට් එක නැති වුණොත් හෝ කවුරුහරි හොරකම් කළොත් ඔයා ලොකු නීතිමය ප්රශ්නවලට මැදිවෙන්න පුළුවන්. අන්න ඒ නිසා, ඔයාගේ පාස්පෝට් එක නැති වුණොත් වහාම කරන්න ඕනේ මොනවාද, අලුත් එකක් හදාගන්නේ කොහොමද, සහ පාස්පෝට් එක පරිස්සම් කරගන්නේ කොහොමද කියලා අපි හරිම සරලව මේ ලිපියෙන් කතා කරමු.
පාස්පෝට් එක නැති වුණ සැනින් ඔයා කරන්න ඕන
පළවෙනි පියවර
ඔයාගේ පාස්පෝට් එක නැති වෙලා කියලා දැනගත්තු ගමන්ම බය වෙන්නේ නැතුව ප්රධාන වැඩ දෙකක් කරන්න ඕනේ. පළවෙනි එක තමයි ඔයාගේ පාස්පෝට් එක වෙනත් කෙනෙක් අතට පත්වෙලා නරක වැඩකට පාවිච්චි කරන එක වළක්වන්න ඒක වහාම අවලංගු කරන එක. දෙවැනි එක තමයි ඊශ්රායල් නීතියට අනුව මේ ගැන පොලිසියට පැමිණිලි කරන එක.
ලංකාවේ ආගමන විගමන දෙපාර්තමේන්තුවට දැනුම් දීම පාස්පෝට් එක නැති වුණ වහාම ලංකාවේ ආගමන හා විගමන දෙපාර්තමේන්තුවට ඒ ගැන දැනුම් දෙන්න ඕනේ. ඒකට ඔයාට ලංකාවේ වේලාවෙන් සඳුදා සිට සිකුරාදා දක්වා උදේ 8:30 ඉඳලා හවස 4:00 වෙනකම් ක්රියාත්මක වෙන 0112 101 533 කියන ක්ෂණික ඇමතුම් අංකයට කතා කරන්න පුළුවන්.
එහෙමත් නැත්නම් දවසේ පැය 24 පුරාම වැඩ කරන 011-2885358 ෆැක්ස් අංකයට ෆැක්ස් පණිවිඩයක් යවන්නත් පුළුවන්. මේ විදිහට දැනුම් දුන්නට පස්සේ ඔයාගේ නැතිවුණ පාස්පෝට් එක ජාත්යන්තර පොලිසිය (INTERPOL) හරහා ලෝකය පුරාම අවලංගු වෙනවා. ඒ නිසා කාටවත් ඒක පාවිච්චි කරලා ගුවන් ගමන් යන්න හෝ වෙනත් නීති විරෝධී වැඩ කරන්න බැහැ. හැබැයි මතක තියාගන්න, එක පාරක් පැමිණිලි කරලා අවලංගු කරපු පාස්පෝට් එකක් පස්සේ කාලෙක ආපහු හමු වුණත් කවදාවත් ආයේ පාවිච්චි කරන්න එපා.
ඊශ්රායල් පොලිසියට පැමිණිලි කිරීම
ඊළඟට ඔයා ඊශ්රායල් පොලිසියට ගිහින් පැමිණිල්ලක් දාලා නිල පොලිස් වාර්තාවක් (Police Report) ගන්න ඕනේ. පස්සේ කාලෙක තානාපති කාර්යාලයෙන් අලුත් පාස්පෝට් එකක් ඉල්ලද්දී මේ පොලිස් වාර්තාව අනිවාර්යයෙන්ම ඕන වෙනවා. පොලිසියට පැමිණිලි කරන්න ක්රම දෙකක් තියෙනවා. පළවෙනි ක්රමය තමයි ඔයා ඉන්න ප්රදේශයේ තියෙන ඕනෑම පොලිස් ස්ථානයකට කෙලින්ම ගිහින් පැමිණිල්ල දාන එක.
දෙවැනි ක්රමය තමයි ඊශ්රායල් රජයේ නිල වෙබ් අඩවිය
(www.gov.il/en/service/request-file-complaint-online-during-emergency) හරහා අන්තර්ජාලයෙන් පැමිණිලි කරන එක. මේකට ඔයා මුලින්ම රජයේ හඳුනාගැනීමේ පද්ධතියේ (GovID) ලියාපදිංචි වෙන්න ඕනේ. අන්තර්ජාලයෙන් පැමිණිල්ල දැම්මට පස්සේ පොලිස් විමර්ශකයෙක් ඒක පරීක්ෂා කරලා ඉවර කරනකම් ඒක නිල පැමිණිල්ලක් විදිහට සලකන්නේ නැහැ.
හදිසි ආරක්ෂක උදව්වක් ඕන වුණොත් ඔයාට 100 අංකයෙන් පොලිසිය අමතන්න පුළුවන්. ඒ වගේම සාමාන්ය තොරතුරු සඳහා 110 අංකයත්, තාක්ෂණික සහාය සඳහා 03-5677177 අංකයත්, GovID පද්ධතියේ ගැටලුවලට 1299 අංකයත් පාවිච්චි කරන්න පුළුවන්.
ශ්රී ලංකා තානාපති කාර්යාලය හරහා අලුත් පාස්පෝට් එකක් ඉල්ලන්නේ කොහොමද?
පොලිස් වාර්තාව ගත්තට පස්සේ ඊශ්රායලයේ බෙනී බ්රැක් (Bnei Brak) වල පිහිටලා තියෙන ලංකා තානාපති කාර්යාලයට යන්න ඕනේ. අලුත් පාස්පෝට් එකක් හදාගන්න ඔයා අනිවාර්යයෙන්ම තානාපති කාර්යාලයට පුද්ගලිකවම යන්න ඕනේ.
තානාපති කාර්යාලයේ තොරතුරු
ලංකා තානාපති කාර්යාලය පිහිටලා තියෙන්නේ B.S.R. 2 ගොඩනැගිල්ලේ, 30 වැනි මහලේ (වයඹ දිශාව), 1 බෙන් ගුරියන් පාර, බෙනී බ්රැක් (Bnei Brak), 5120149, ඊශ්රායලය කියන ලිපිනයේ.
ඔයාට +972 3 527 7638, 5 හෝ 6 කියන දුරකථන අංකවලින් හෝ [email protected] විද්යුත් තැපෑලෙන් ඔවුන්ව සම්බන්ධ කරගන්න පුළුවන්.
කාර්යාලය විවෘතව තියෙන්නේ සඳුදා සිට සිකුරාදා දක්වා උදේ 8:15 සිට හවස 4:15 දක්වා විතරයි. සති අන්ත දවස්වල වගේම ලංකාවේ සහ ඊශ්රායලයේ නිල නිවාඩු දවස්වලට තානාපති කාර්යාලය වහලා තියෙනවා. එතැනට යන්න කලින් තානාපති කාර්යාලයේ නිල වෙබ් අඩවිය (www.srilankaembassyil.com) හරහා දිනයක් සහ වේලාවක් වෙන් කරවා ගැනීම (Appointment) අත්යවශ්යයි.
අලුත් පාස්පෝට් එකක් ගන්න ඕන කරන ලේඛන
තානාපති කාර්යාලයට යද්දී මෙන්න මේ ලේඛනවල මුල් පිටපත් (Originals) සහ ඒවායේ පැහැදිලි ෆොටෝකොපි අරගෙන යන්න ඕනේ
අයදුම්පත (K - IM 35 Form): මේ අයදුම්පත ඉංග්රීසි කැපිටල් අකුරින් පිරවිය යුතු අතර, දෙවැනි පිටුවේ තියෙන අත්සන නියමිත කොටුව ඇතුළේ විතරක් තියෙන්න ඕනේ.
නැතිවුණු බව කියන පත්රිකාව: තානාපති කාර්යාලයෙන් දෙන විශේෂ පෝරමයක්.
ඡායාරූප (ෆොටෝ): ළඟකදී ගත්තු සයිස් එක 3.5cm x 4.5cm වන සුදු පසුබිම් ඇති පාස්පෝට් ෆොටෝ 3ක්. කණ්ණාඩි දාලා හෝ නළලේ තිලක තියලා තියෙන්න බැහැ. කන් දෙක සහ මුහුණ පැහැදිලිව පෙනෙන්න ඕනේ.
පොලිස් වාර්තාව (Police Report): ඊශ්රායල් පොලිසියෙන් දුන්න මුල් වාර්තාව. ඒක හීබෲ භාෂාවෙන් තියෙනවා නම්, නීත්යානුකූල ඉංග්රීසි පරිවර්තනයක් ද තියෙන්න ඕනේ.
දිවුරුම් ප්රකාශය (Affidavit): පාස්පෝට් එක නැතිවුණේ කොහොමද කියලා විස්තර කරලා නොතාරිස් කෙනෙක් ඉස්සරහා අත්සන් කරපු එකක්. මේක තානාපති කාර්යාලයේදීම අත්සන් කරලා සහතික කරගන්නත් පුළුවන්.
පරණ පාස්පෝට් එකේ කොපියක්: ඔයා ළඟ පරණ පාස්පෝට් එකේ ප්රධාන පිටුවේ සහ වීසා පිටුවේ ෆොටෝකොපියක් තියෙනවා නම් ඒකත් දෙන්න ඕනේ.
උප්පැන්න සහතිකය: ලංකාවේ රෙජිස්ට්රාර් ජනරාල් දෙපාර්තමේන්තුවෙන් නිකුත් කරපු මුල් උප්පැන්න සහතිකය.
ජාතික හැඳුනුම්පත (NIC): මුල් හැඳුනුම්පත ගෙනියන්න ඕනේ. හැඳුනුම්පතක් නැත්නම්, ඒකට හේතු දක්වලා ලියපු ලියුමක් ඉදිරිපත් කරන්න වෙනවා.
වීසා සහ විවාහ සහතික: ඔයාගේ ඊශ්රායල් වීසා බලපත්රයේ කොපියක් ගෙනියන්න ඕනේ. ඒ වගේම කසාද බැන්දට පස්සේ වාසගම වෙනස් කරපු කාන්තාවන් මුල් විවාහ සහතිකයත් ගෙනියන්න ඕනේ.
වියදම් සහ පාස්පෝට් එක ලැබෙන්න යන කාලය
අලුත් පාස්පෝට් එකක් හදන්න ලංකාවේ ආගමන විගමන දෙපාර්තමේන්තුවට යවන්න ඕන නිසා, මේ මුළු ක්රියාවලියටම සාමාන්යයෙන් දින 90ක් (මාස 3ක්) විතර යනවා. ඉක්මනින් පාස්පෝට් ගන්න කිසිම හදිසි සේවාවක් (One-day service) නැහැ. ඒ වගේම අලුත් පාස්පෝට් එක ලැබුණාම ඒක ගන්න යන්න ඕනේ ඔයාම විතරයි.
මේ සඳහා යන වියදම් මෙන්න මේ විදිහටයි සිද්ධ වෙන්නේ ඔයා ළඟ පරණ පාස්පෝට් එකේ කොපියක් තියෙනවා නම් අය කරන ගාස්තුව ඇමෙරිකානු ඩොලර් 373ක් වෙනවා. හැබැයි ඔයා ළඟ පරණ පාස්පෝට් එකේ කිසිම කොපියක් නැත්නම් අය කරන ගාස්තුව ඇමෙරිකානු ඩොලර් 473ක් වෙනවා. ඒ වගේම, දිවුරුම් ප්රකාශය තානාපති කාර්යාලයෙන්ම ලියලා සහතික කරගන්නවා නම් ඒකට තව ඩොලර් 68ක් ගෙවන්න වෙනවා.
යම් හෙයකින් ඔයාට මාස 3ක් ඉන්න බැරුව හදිසියේම ලංකාවට යන්න සිද්ධ වුණොත්, ලංකාවට විතරක් යන්න පුළුවන් තාවකාලික හදිසි ගමන් බලපත්රයක් (NMRP) ඩොලර් 169ක් ගෙවලා ලබාගන්න පුළුවන්. හැබැයි මේකෙන් වෙන රටවල සංචාරය කරන්න හෝ ඊශ්රායලයේ වීසා අලුත් කරන්න බැහැ. සියලුම ගෙවීම් තානාපති කාර්යාලයට මුදලින් (Cash) හෝ ඔවුන් කියන බැංකු ගිණුමකට ගෙවන්න ඕනේ. එක පාරක් ගෙවපු මුදල් කිසිම හේතුවක් මත ආපහු දෙන්නේ නැහැ.
ඊශ්රායලයේ වත්මන් ආරක්ෂක තත්ත්වය සහ පාස්පෝට් එක පරිස්සම් කරගන්නේ කොහොමද?
දැනට ඊශ්රායලයේ පවතින ආරක්ෂක සහ යුදමය තත්ත්වය නිසා ආරක්ෂක විධිවිධාන ඉතාම ඉහළ මට්ටමක පවතින්නේ. ගුවන් තොටුපළවල් වහලා තියෙන වෙලාවට සහ ගුවන් ගමන් ප්රමාද වෙනකොට ඔයාගේ වීසා කාලය ඉවර වුණොත් ලොකු ප්රශ්නයක් වෙන නිසා නිතරම තානාපති කාර්යාලය එක්ක සම්බන්ධ වෙලා ඉන්න එක වැදගත්.
ඔයාගේ ආරක්ෂාව සහ පාස්පෝට් එක පරිස්සම් කරගන්න මෙන්න මේ දේවල් අනිවාර්යයෙන්ම කරන්න
ඩිජිටල් කොපි තියාගන්න: ඔයාගේ පාස්පෝට් එකේ ප්රධාන පිටුව, ඊශ්රායල් වීසා එක සහ හැඳුනුම්පත ෆෝන් එකෙන් පැහැදිලිව ෆොටෝ ගහලා ඔයාගේ Google Drive, iCloud හෝ Email එකේ දාලා තියාගන්න. පාස්පෝට් එක නැති වුණත් ඔයා කවුද කියලා ඔප්පු කරන්න මේක ගොඩක් උදව් වෙනවා.
ෆොටෝකොපියක් ළඟ තියාගන්න: එළියට යද්දී හැමතිස්සෙම ඔරිජිනල් පාස්පෝට් එක අරන් යන්නේ නැතුව, ඒ වෙනුවට පාස්පෝට් එකේ සහ වීසා එකේ පැහැදිලි කලර් කොපියක් ළඟ තියාගන්න.
හදිසි බෑගයක් ලෑස්ති කරගන්න: යුදමය හදිසි අනතුරු ඇඟවීම් (Alarms) ඇහෙනකොට ආරක්ෂිත කාමර (Mamad) හෝ බංකර් වෙත ඉක්මනින් දුවන්න සිද්ධ වෙනවා. අන්න ඒ වගේ වෙලාවට ලේසියෙන් අරන් යන්න පුළුවන් වතුර නොයන කුඩා බෑගයක ඔයාගේ පාස්පෝට්, වීසා ඇතුළු වටිනා ලේඛන නිතරම දාලා සූදානම් කරලා තියාගන්න.
කාටවත් දෙන්න එපා ඔයාගේ පාස්පෝට් එක කිසිම හේතුවක් මත වෙනත් අයෙකුට ළඟ තබාගන්න දෙන්න හෝ සල්ලිවලට උකස් කරන්න එපා. ඔයාගේ පාස්පෝට් එක පාවිච්චි කරලා වෙන කෙනෙක් නීති විරෝධී වැඩක් කළොත් ඒකේ සම්පූර්ණ වගකීම ඔයාට ගන්න සිද්ධ වෙනවා.
අවසාන වශයෙන් කියන්න තියෙන්නේ ඔයාලට
ඊශ්රායල්වල ඉන්න අපේ අයට පාස්පෝට් එක නැති වෙනවා කියන්නේ ලොකු කරදරයක් වුණත්, නියමිත පියවර ටික හරියටම කළොත් ප්රශ්නයක් නැතුව අලුත් එකක් හදාගන්න පුළුවන්. නැතිවුණු වහාම ආගමන විගමන දෙපාර්තමේන්තුවට සහ පොලිසියට දැනුම් දීලා, ඊටපස්සේ තානාපති කාර්යාලයට ගිහින් අලුත් එකකට අයදුම් කරන්න. ඒ දින 90 ක කාලය ඇතුළත ඔයාගේ වීසා සහ රැකියාව ආරක්ෂා කරගන්න සේවා යෝජකයා (Employer) එක්කත් හොඳින් සාකච්ඡා කරන්න. නිතරම ආරක්ෂක උපදෙස් පිළිපදිමින් කල්පනාකාරීව සහ පරිස්සමෙන් ඉන්න.
මෙහි සදහන් විස්තර වල යම් වැරැද්දක් ඇත්නම් පහලින් comment එක්ක මගින් එය නිවැරදි කරන්න.
ඔයාලා මේ ගැන දන්න විස්තරත් පහලින් ලියාගෙන යන්න
ජය වේවා.
සටහන තුෂල්ක ✍️
