26/08/2026
नझुक्किनु होला, नेपालमा ‘भोटेकोशी’ नामका दुईवटा नदी छन्। एउटा ‘भोटेकोशी’ नदी सिन्धुपाल्चोकमा र अर्को रसुवामा। सिन्धुपाल्चोकको ‘भोटेकोशी’ नदीको स्रोत तिब्बतको ‘झाङझाङ्बु’ हिमनदी हो। तिब्बतमा यसलाई ‘पोइकु’ भनिन्छ र नेपाल प्रवेश गरेसँगै ‘भोटेकोशी’ नामले चिनिन्छ। यो नदी सिन्धुपाल्चोकको दोलालघाटमा आएर ‘सुनकोशी’ नदीमा मिसिन्छ र ‘सप्तकोशी’ नदी प्रणालीको हिस्सा बन्न पुग्छ।
अर्को रसुवाको ‘भोटेकोशी’ नदी तिब्बतबाट आउने ‘केरुङ खोला’ र ‘ल्हेन्दे खोला’ रसुवागढी क्षेत्रमा मिलेपछि नेपालमा ‘भोटेकोशी’ नामले चिनिन्छ। यो नदी पछि ‘त्रिशूली’ नदीमा मिसिन्छ र ‘सप्तगण्डकी (नारायणी)’ नदी प्रणाली हुँदै अघि बढ्छ। आज आएको बाढी रसुवाको ‘भोटेकोशी’मा हो।
