31/10/2026
BMB AGRO: КЕЛГУСИ ЙИЛ ҲОСИЛИ УЧУН ПУХТА ТАЙЁРГАРЛИК
Арнасой туманида фаолият юритаётган BMB HOLDING таркибидаги BMB AGRO корхонаси жорий 2026 йилда қишлоқ хўжалиги экинларини етиштириш бўйича олдига қўйган барча режаларини муваффақиятли бажарди.
Бу йил ғаллачилик ва пахтачилик йўналишларида эришилган юқори натижалар корхона жамоасини келгуси мавсумда янада улкан мақсадлар сари ундамоқда. Айни пайтда асосий эътибор янги мавсум ҳосили учун замин яратиш, ердан самарали фойдаланиш ва агротехник тадбирларни ўз вақтида амалга оширишга қаратилган.
Ҳозирда ҳосилдан бўшаган майдонларда белгиланган агротехник тадбирлар изчил давом эттирилмоқда. Хусусан, кузги шудгор ишлари амалга оширилиб, тупроқни келгуси экиш мавсумига тайёрлаш чоралари кўриляпти. Кузги ғалла экиш ишлари эса белгиланган муддатларда тўлиқ якунланди. Айни кунларда майдонларда ғалла майсалари бир текис униб чиқиб, парваришлаш ишларининг кейинги босқичига киришилган.
Корхонада дала маданиятига алоҳида эътибор қаратилаётгани ҳам эътиборга молик. Экин майдонлари атрофи ва четлари бегона ўтлардан тозаланиб, мавжуд ер ресурсларидан янада оқилона фойдаланиш чоралари кўрилмоқда.
Шу билан бирга, экин майдонлари кенгайтирилиб, ҳатто бир қарич ерни ҳам самарасиз қолдирмаслик тамойили асосида иш ташкил этилган. Бу эса нафақат ер унумдорлигини ошириш, балки қишлоқ хўжалиги маҳсулотлари етиштириш ҳажмини кўпайтиришга ҳам хизмат қилади.
BMB AGRO жамоаси эришилган натижалар билан чекланиб қолмасдан, келгуси йилда янада юқори кўрсаткичларга эришишни мақсад қилган. Жумладан, пахта ва ғалла экинлари майдонларини икки бараварга ошириш режалаштирилмоқда.
Албатта, бундай кенг кўламли вазифалар пухта тайёргарлик, илмий асосланган агротехник ёндашув ва масъулиятли меҳнатни талаб этади. Бугундан бошланган саъй-ҳаракатлар эса келгуси йил мўл ва баракали ҳосилнинг мустаҳкам пойдевори бўлиб хизмат қилишига замин яратади.